Irushanwa ryo Guhanga Ibintu Bishya mu Rwanda rihuriwehona Kaminuza n’Inganda mu Bushakashatsi Bugamije Iterambere

Itegeko No 40 ryo kuwa 16.08.2017 rishyiraho Inama y’Igihugu y’Ubumenyi n’Ikoranabuhanga (NCST) riyiha inshingano yo gucunga Ikigega cy’Igihugu Gitera Inkunga Ubushakashatsi no Guhanga Ibintu Bishya (NRIF). NRIF yashyiriweho kuba umuyoboro w’ingenzi wifashishwa na Guverinoma y’u Rwanda mu gutanga inkunga igenewe ubushakashatsi no guhanga ibintu bishya hagamijwe guteza imbere imibereho y’abaturage n’ubukungu, nk’uko iteganywa na gahunda y’iterambere ry’igihugu. 

Muri uru rwego, NCST yashyizeho gahunda nterankunga zitandukanye, zirimo n’iy’ “Inkunga y’Intego yo Guhanga ibintu bishya mu Rwanda igamije ubufatanye hagati y’ibigo by’ubushakashati na za kaminuza n’inganda mu bushakashatsi bugamije iterambere (RIC - R&D)”. Iyi nkunga yashyizweho nk’uburyo bw’ingenzi bwo gufasha ibitekerezo bifite ireme ryo ku rwego rwo hejuru buzateza imbere ubushakshatsi n’amagerageza mu Rwanda binyuze mu bufatanye hagati y’ibigo by’ubushakashati na za kaminuza n’inganda, bugamije guhererekanya ubumenyi hagati y’inganda/abikorera n’ibigo by’ubushakashati na za kaminuza. 

Bityo, ku itariki ya 11 Ugushyingo 2021, NCST yatangaje Inyandiko Ihamagarira Gusaba Inkunga (RFA) ya RIC - R&D. Gutanga izi nyandiko byarangiye kuwa 28 Gashyantare 2022, kubera ko igihe cyo gutanga imishinga cyongereweho iminsi 18. Iri hamagara ryari rigenewe amatsinda y’abashakashatsi aho Umushakashatsi Mukuru (PI) agomba kuba ari umunyarwanda wize ibya siyanse kandi ufite Impamyabumenyi y’Ikirenga (PhD), cyangwa iy’Icyiciro cya Gatatu cya Kaminuza (Masters) mu rwego rw’ubumenyi rukenewe, kandi akagaragaza ko afitanye ubufatanye n’impunguke nibura imwe (1) izwi ku rwego rw’isi muri urwo rwego rw’ubumenyi. 

Biteganyijwe ko Iyi nkunga igutanga amahirwe yo guteza imbere ubufatanye bugamije gusangira ubumenyi hagati y’inganda/urwego rw’abikorera n’ibigo by’ubushakashatsi na za kaminuza. Ibi bigakorwa binyuze mu gutegura no gushyira mu bikorwa imishinga y’ubushakashatsi  ijyanye n’Intego zo Guhanga ibintu bishya mu Rwanda kandi itanga ibisubizo bishya mu nzego z’ingenzi igihugu gishyize imbere. 

Iyi nkunga ya RIC-R&D izashyirwa mu bikorwa mu byiciro bibiri: Icyiciro cya I n’Icyiciro cya II.

Icyiciro cya I: Iki ni icyiciro kigufi kandi kibanza kigamije gutegura imishinga no gutanga amakuru y’ibanze mu rwego rw’igerageza no kugaragaza ko umushinga ushobora gutanga umusaruro. Intego y’inkunga izatangwa muri iki cyiciro ni ugufasha gutegura, kugerageza no gushyira mu bikorwa ibitekerezo bizashingirwaho ubushakashatsi bugamije impinduka bifite amahirwe yo gushyirwa ku isoko no kwakirwa mu rwego rw’ikoranabuhanga, kandi bishingiye ku bufatanye hagati y’inganda n’ibigo by’ubushakashatsi na za kaminuza. 

Icyiciro cya II: Mu cyiciro cya kabiri, abateguye imishinga yatoranijwe mu mishinga yatewe inkunga mu cyiciro cya I bazahamagarirwa gusaba inkunga yo kuzamura urwego rw’imishinga yabo izabafasha kuyitunganya, kuyigerageza, kuyishyira mu bikorwa ndetse no kwagura no gutuma ibyagezweho mu gihe cy’igerageza biramba. 

Nyuma yo gusuzumana ubwitonzi n’ubushishozi imishinga yatanzwe, NCST yatoranije imishinga icumi (10) myiza kuruta indi maze ihabwa iyi nkunga. Imishinga yatoranijwe igaragaza uburyo ibizayivamo bishobora kuzana ibintu bishya bishobora kuzashyirwa ku isoko nk’ibicuruzwa cyangwa serivisi nshya. Imishinga yatewe inkunga n’amakuru arambuye kuri yo biri mu mbonerahamwe ikurikira: